Sakanako euskaltzaleek badute urtero hitzordu bat euskal kulturarekin
Aurten Sakanako Berrialagunek, Sakanako Mankomunitateak eta Altsasuko Udalak ESANEZIN taldearen emanaldia antolatu dute.

Esanezin Ianire Aranzaberen (Altzagarate, 1999) bakarkako proiektua da. 2021. urtean kaleratu zuen “Aireratzen” bere lehen disko laburra, zazpi kantuz osatuta. Pop doinuak jorratzen ditu nagusiki eta 2021ean bakarkako formatuan lehen kontzertuak eman ondoren laukote formatua hartu du proiektuak, Arri Iraeta, Iñigo Asensio eta Imanol Rubio bidelagun dituela.

2023an eszenatokietatik zertxobait urrundu eta urte amaieran ikusi zuen argia “Erretratu Bat” lehen lan luzeak. Hemen eta orain gure ingurura begiratzeko modu bati erreferentzia eginez. Egunerokotasunari, priblilegioei, hautuei, beldurrei, zauriei; ezinbestean gure begiek ikusten dutenari eta zenbaitetan ikusten ez dutenari erretratu bat egitearen beharra gordetzen da kantuetan. Bigarren lan hau Oiartzungo Lezoti Estudioan grabatu, nahastu eta masterizatua izan da Gorka Urraren eskutik.

SARRERAK BERRIA DENDA atalean eta Iortia kulturguneko atarian. Zatozte urteroko Sakanako BERRIAlagunen ospakizun handira!

Sarreren dirua Berriarendako izanen da.