Datorren azaroaren 23tik abenduaren 1era Tolosan nazioarteko txotxongilo jaialdia izango da eta aurten 42. urteurrena beteko du. Azaroaren 23tik abenduaren 1era TITIRIJAI jaialdiaren edizio berri bat izango dugu. Euskadiko Arte Eszenikoen barruan kultura-erreferente den jaialdiaren 42. edizioa izango da. Azaroko hamar egunetan zehar, Estatuko eta nazioarteko konpainiek euren ikuskizunak aurkeztuko dituzte herriko gune ezberdinetan. Txotxongiloen profesionalentzako topaketa da. Publikoak ere, haur zein helduak, antzezpen desberdinekin gozatzeko erakusleiho ederra aurkituko du. Bertan testu klasikoetako istorioak antzezpen koloretsu, moderno eta berritzaileekin nahastuko dira. TITIRIJAI Txotxongiloen Nazioarteko Jaialdiak, txotxongiloen alorrean sormena eta berrikuntza bultzatu nahi ditu, eta artistei euren lanak bisitariekin partekatzeko gunea eskaini nahi die. Horrela, jarduera desberdinak eskaintzen dira bertaratzen direnek ikus-entzunezko, txotxongilo eta objektu-antzerkiaren aukerak ezagutzeko aukera paregabea izan dezaten; profesionalentzat zein afizionatuentzat diseinatua. Jarduera hauek txotxongiloen munduan murgiltzeko eta arte forma hau sakonago ezagutzeko modu bikaina dira. Aurtengo egitarauak nazio mailako eta nazioarteko lanen aukeraketa anitza eskainiko du. Murtzia, Malaga, Granada, Extremadura, Katalunia eta Euskal Herriko konpainien emanaldiak izango ditugu, Italia eta Frantziakoekin batera. Herriz-herri ibiliko den ikuskizunen zirkuitua herri hauetatik pasako da: Ordizia, Beasain, Donostia, Hondarribia, Zarautz, Eibar, Sestao eta Pasaia. Zirkuitua urtero gure geografiako txoko ezberdinetara hurbiltzen gaituen hitzordu klasiko bat da. Bestalde, UNIMA Euskalherriak gidatutako Udazken Eskola berria izango dugu. Jaialdian, Paco Paricioren (Titiriteros de Binéfar) “Txotxongiloaren sekretuak” liburua eta “Titiritari” poema liburu ilustratua aurkeztuko dira. Senidetze ekitaldi bat ere izango dugu, La punctual eta Titiriteros de Binéfar konpainien artekoa. Azkenik, L’Estaquirot Teatroren 40. urteurrena ospatuko dugu, TOPIC-eko aldi baterako erakusketa berriaren bitartez.