Jaiotz Osa euskal koreografoak eta Sigrid Stigsdatter Mathiassen koreografoak aurkeztuko dute 2019ko dantza garaikideko egonaldian Azkuna Zentroan eta Dansateliers Rotterdam zentroan egin dituzten proiektuen emaitzak, Holandako dantza garaikidea sortzeko eta erakusteko zentroarekin elkarlanean eta trukean aritzeko egindako akordioari esker sortutako lanak. Bi artistek Bilbon aurkeztuko dituzte piezak, Moving Future Festival 2020 Herbehereetako Dantza Garaikideko Jaialdian eszenaratu ondoren. Jaiotz Osa dantzaria eta koreografoa OSA+MÚJIKA konpainiako kidea da. Jaiotz Osa eta Xabier Mujikaren topaketa artistikoaren ondorioz sortu zen konpainia, eta sormenezko bi mundu batzen ditu, dantza eta eszenografia/jantziak. Loser piezan, hausnarketa egiten du milenialez, beren harreman sozialez, sareekiko duten mendekotasunaz eta gizartearen itxaropenez: «Berezia nintzela esan zidaten denbora guztian. Eta esan zidaten nahi nuen guztia edukiko nuela bizitzan, nahi izate hutsagatik. Mundu errealean erori nintzen, eta berehala jakin nuen ez naizela berezia, eta ez dudala desiratzen dudan guztia edukiko, nahi izate hutsagatik». Euskal dantzariarekin harremanetan, Sigrid Stigsdatter Mathiassen koreografo, performer eta bokalistak (1990, Danimarka) solo modura aurkeztuko du bere proiektuaren emaitza: mugimenduen eta ahotsaren arteko nahasketa bat, sortzailearen lanaren abiaburu dena, hitzak eta mugimenduak esploratzen dituena, errealitatearen eta imajinazioaren arteko mugak lausotzeko tresna gisa. Piezaren 'work in progress'ean, artistak honela deskribatu zuen bere proiektua: «Gogoan ditut historiak, pertsonaiak eta fikzioak. Gogoan dut fikzioak eraikitzea eta berriz eraistea. Gogoan dut irudi zail bat izatea gorputz zail batean, dantzaren bidez bidaiatzen dena, bihotza zabalik eta gogo kritikoz». Fundación Banco Sabadellek Azkuna Zentroa - Alhóndiga Bilbaoko Egonaldi Artistikoen Programa babesten du, artea eta kultura sustatzeko eta hedatzeko duen programaren barruan. Azkuna Zentroa - Alhóndiga Bilbaoko Egonaldi Artistikoen Programak euskal hizkuntza eta kultura mundu osotik zabaltzeaz arduratzen den Etxepare Euskal Institutuaren laguntza du.