2024ko Mapamunditarrak ekimenaren barne. La Tercera Piedra erakusketak bi artista biltzen ditu, Amaia Molinet eta Eriz Moreno, joan den XX. mendean errepresio bortitz eta erresistentziako gertaeren eszenatoki izan diren lekuak berrikusteko interesa partekatzen dutenak. Oinez ibiltzea, entzutea, aztarnak erregistratzea, laginak hartzea, argazkiak ateratzea, igurztea, testigantzak biltzea dira lurrean egin dituzten keinuetako batzuk, harrietan eta hormetan dagoen memoria ezkutua azaleratzeko eta hutsune batzuk seinalatzeko borondatearekin. Ziudadelako Poterna kaleko 6. zenbakian hiru serie daude, Memoria Historikoko leku hauei lotuak: Teufelsbergeko mendia (Berlin); Carabanchelgo kartzela zaharraren orubea (Madril); Iruñeko espetxe probintzial zaharraren kokapena eta San Cristobal gotorlekua.