Artium Museoko bildumaren funtsak ditu ardatz erakusketa honek, eta euskal testuinguruan garatutako praktika artistiko eta kulturalei buruzko gogoeta zabala egiten du. 1977. urtea da Zeru bat, hamaika bide erakusketaren abiapuntua, gertaera politiko, sozial eta kultural handien garaiaren hasier: besteak beste, lehenengo hauteskundeak egin ziren, lau hamarkadako diktaduraren ondoren, edo instituzio-esparru berri bat sortu zuten legeak aldarrikatu ziren. Aldi horretan egin ziren, orobat, Emakumearen I. Jardunaldiak, hiru urte geroago Euskal Herriko Unibertsitatea izango zen hartan. Bi hamarkada baino gehiago hartzen dituen duen erakusketa hau 2002. Urtean amaitzen da, Artium Museoa ireki zen urtean. Praktika artistikoak, kultura-adierazpenak eta prozesu historikoak lotuz, erakusketak, besteak beste, honako gai hauek jorratzen ditu: aldi horretan gertatutako instituzionalizazio-prozesuak, artisten parte-hartzea kultura-politiken eraketan, praktika artistikoen eta gizarte-mugimenduen arteko gurutzaketak, kontzientzia feminista sortzea edo XX. mendearen amaieran tokikoaren eta globalaren artean izandako tentsioak. Gure egungo orainaren konplexutasuna eta aberastasuna erakusten duten ahotsen, moduen eta egiteko moduen batura, iragan hurbilari begira. Zeru bat, hamaika bide narratiba ireki, inklusibo eta etengabe eraikitzen ari den baten eran planteatzen da, eta hainbat ikerketa eta azterketa-kasu sartuz joango da Museoko aretoetan. Erakusketa honen barruan, Eusko Jaurlaritzako Kultura eta Hizkuntza Politika Sailaren proiektua den Komisario Berriak programaren baitan sortutako bi ikerlan aurkezten dira. Lehenengoak azterlan-kasu itxura hartzen du, eta Garazi Ansa arte-historialaria da komisarioa. Hemen dira hutsunean igeri egindakoak. Tururu izenburuarekin, proiektu honek laurogeiko eta laurogeita hamarreko hamarkadetan euskal testuinguruan izandako praktika artistikoen eta mugimendu feministaren arteko loturak lantzen ditu. Bestalde, Laura Vallés komisario eta editoreak gogoeta egiten du 1989. Harean zehar erakusketan jarrera kritikoei eta ZEHAR eta Arenaren jardunbideei buruz, zeinak arteari eta pentsamendu kritikoari lotutako bi argitalpen baitziren, 1989an abian jarri zirenak. Komisariotza: Xabier Arakistain, Beatriz Herráez, Miren Jaio, Elena Roseras
Eranskinak: Garazi Ansa, Laura Vallés
Proiektuaren koordinazioa: Daniel Eguskiza. Erakusketaren diseinua: Gorka EizagirreInaugurazioa: otsailaren 7an, ostirala, 20:00etan