DNAren edizio berria aurkezten dute; Nafarroako Antzokien Sareko eta gure erkidegoaren barruko eta kanpoko espazio batzuetan sorkuntzak eta emanaldiak biltzen ditu. Programaren hasieran, 2023ko DNAko sorkuntza prozesuetan sortutako lanak estreinatzen dira. Hilabete batez, apirilaren 12tik maiatzaren 10era, Zuk Performing Arts, Dinamo Danza, Disden. cia eta Riart Company konpainiek 18 emanaldi eskainiko dituzte Nafarroako lurralde osoan. Edizio honetan, DNA egonaldi artistikoen programaren barruan, Qabalum, Akira Yoshida, Ioar Labart eta Aimar Odriozola konpainien proiektuak hautatu dira. Lau astez, beren sorkuntza proiektuak garatuko dituzte eta, gainera, elkartzeko eta dantza komunitatearen gainean hausnartzeko guneak sortuko dira. Egonaldiak eta emanaldiak egiten diren herrietan, bitartekotza ekintza batzuk ere eginen dira, ikusleek dantza garaikidea hurbilagotik ezagutu dezaten eta ingurunean jarrera positiboa egon dadin diziplina artistiko horrekiko. Bestalde, lankidetzan jarraitzen dugu Nafarroan eta Nafarroatik kanpo dantza garaikidea sustatzeko helburua duten proiektu eta entitateekin, denon ahaleginak bateratuz. Hala, Atalak mugaz gaindiko proiektuaren zenbait esperientzia izanen ditugu, Nafarroako Unibertsitatea museoko Museoa Dantzan zikloan parte hartuko dugu, eta Dansa València jaialdiarekin lankidetzan arituko gara. Lankidetza hori aurten hasiko da, jarraitzeko konpromisoarekin, eta Led Silhouette konpainiak parte hartuko du programazioan. Halaber, Nafarroako prestakuntza eta hezkuntza zentroekin lankidetzan jarraitzen dugu, ikasleek DNAn haientzat berariaz diseinatutako jardueretan parte har dezaten. DNA. Nafarroako Dantza Garaikidea programa artistikoa Vianako Printzea Erakundea-Kultura Zuzendaritza Nagusiak antolatzen du, Baluarte fundazioarekin batera, dantza garaikidea eta mugimenduaren arteak sustatzeko. - DNA 2024: egitaraua (pdf)