MUSIKASTE – Euskal Musikaren Asteak 52. edizioari ekingo dio 2024an, Eresbil – Musikaren Euskal Artxiboaren urrezko ezteien ospakizun betean. 1974an sortutako erakundea da Eresbil, eta gure konpositoreen obrez hornitzea izan zuen jatorri, musika astean interpretatzeko. Erabakigarria izan da astearen bilakaeran, euskal musika-ondarea babesteko lan handia egin baitu. Bien jarduerak aukera ematen du jaialdiaren helburuak betetzen jarraitzeko, hala nola sortzaileei eta interpreteei laguntzea, haien musika deskubritzea eta egungo konpositoreei laguntza berezia ematea.

MUSIKASTE maiatzaren 17an hasiko da "Panpin Orkestra" izeneko ikuskizunarekin, Idoia Hernández “HATXE”ren konposizioak oinarri hartuta. Errenteriako musikariek eta poetek, Herri Arte Eskolako orkestrarekin batera, beren ikuspegi musikal eta artistikoa eskainiko dute.

Larunbatean, hilak 18, dantza izango da protagonista eta Kukai Dantza Taldearen emanaldia eta Txalaparta izeneko ikuskizun berriaren aurkezpena ikusi ahal izango ditugu. Jesús Rubio Gamoren koreografiarekin, Jon Mayaren zuzendaritza artistikoarekin batera, taldeko kideek sustraiko dantzaren eta haren ikuspegi garaikide berriaren artean nabigatuko dute.

Igandean Errenteriako Udal Txistulari Bandaren ohiko Diana izango da, eta ondoren kontzertua eskainiko du. Parrokian, Ignacio Arakistainek organo kontzertua interpretatuko du eta, ondoren, Errenteriako Andra Mari abesbatzarekin batera, José Mª Goicoechea eta Pedro Aizpuruaren obrak interpretatuko ditu. Goizeko saioari amaiera emateko, Errenteriako Musika Bandak Luis Fraca, zendu berriaren oroimenez, Luis de Aramburu eta José Luis Marcoren obrak joko ditu. Arratsaldean, Lekuona Fabrikan, "Koloreka kantari" izeneko haurrentzako abesbatzari buruzko jardunaldia egingo da. Herriko bost ikastetxek kontzertua eskainiko dute elkarrekin.

Hurrengo astean, hilaren 22ko eta 23ko jardunaldi pedagogikoak nabarmendu behar dira. Perkusioari buruzko ikuskizuna eskainiko da, Living Room Music izenekoa, eta txikienen gozamena ekarriko du.

Maiatzaren 22an musika garaikidearen txanda izango da. Jon Ansorenak, txistuak, Gorka Catedianok, perkusioak, eta Maria Zubimendik, eskusoinuak, osatzen dute Trío Zukan hirukotea, eta Miren Lizeaga dantzariarekin batera Zuriñe F. Gerenabarrena, María Eugenia Luc, Juan José Eslava eta Francisco Domínguezen obrak joko dituzte, besteak beste.

Ganbera musikak hartuko du lekukoa hilaren 23an, ostegunarekin, Tomás Garbizu, P. Donostia, Félix Lavilla, Jesús Guridi eta Maurice Ravelen lanen egitarau anitzarekin, Pavel Gomziakovek txeloan eta Josu Okiñenak pianoan interpretatuak.

Ostiralean, hilak 24, bi kontzertu izango dira egun berean. Lehenbizikoa herri musikari buruzkoa izango da, Alain Griffin instrumentista zenaren oroimenez. Irati Irizarrek (biolina), Arkaitz Minerrek (gitarra) eta Herri Arte Eskolako dultzaina-taldeak "Halfway to hell" izeneko liburutik aukeratutako errepertorioa eskainiko dute . Bigarren kontzertua, berriz, musika koralari eskainia izango da eta Euskal Herriko hainbat lurraldetako taldeak izango dira bertan, hala nola, Baiona Euskal Herriko Abesbatza sortu berria, Bihotz Alai Algortako (Getxo) abesbatza beteranoa, Easo Emakumeen Abesbatza donostiarra eta Errenteriako Landarbaso Abesbatza, besteak beste. Formazio horiek izango dira bertan eta errepertorio anitza interpretatuko dute, J. C. Arriagaren, Vicente Goicoechearen, José Domingo de Santa Teresaren, Javier Bustoren, Jesús Guridiren eta José de Olaizolaren obrekin.

Amaitzeko, kontzertu sinfoniko-koralak itxiko du edizio hau. Euskadiko Orkestrak eta Andra Mari Abesbatzak, Baldur Brönnimannen zuzendaritzapean, Ramon Lazkano, Itziar Viloria eta Pascual Aldaveren obrez osatutako errepertorio exijentea aurkeztuko dute. Gainera, Pascual Aldave jaio zeneko mendeurrena ospatuko dugu ekitaldian.

- Musikaste 2024: egitaraua (pdf) EGITARAUA

- Maiatzak 17, "Panpin Orkestra"
- Maiatzak 18, Kukai: "Txalaparta"
- Maiatzak 19, Musika liturgiko eta organo kontzertua.
- Maiatzak 19, Errenteriako Udal Txistulari taldea.
- Maiatzak 19, Errenteriako Musika Banda.
- Maiatzak 19, "Koloreka kantari"
- Maiatzak 22, Trío Zukan
- Maiatzak 23, Pavel Gomziakov + Josu Okiñena
- Maiatzak 24, Alain Griffin-en albokarako doinuak
- Maiatzak 24, Koruen Eguna
- Maiatzak 25, Euskadiko Orkestra & Andra Mari Abesbatza