Bizkaiko Foru Aldundiak lurraldeko museoak ezagutzeko paseoa antolatu du Bizkaiko museoekin batera. Erakusketa hau herritarrentzat gonbidapen bat da museoen aniztasuna ezagutu dezaten eta bisitatzera animatu daitezen. Erakusketa Bilboko Uribitarteko pasealekuan izango da uztailaren 8ra arte. Bizkaiko 32 museoren bildumetan dauden piezarik adierazgarrienak bidera irtengo zaizkie, astelehenetik aurrera, Bilboko Uribitarteko pasealekuan dabiltzanei. Bizkaiko Foru Aldundiak zenbait totem eskerga atondu ditu, museo bakoitzak aukeratutako pieza batekin. Honela, foru-erakundeak Lurraldeko museoen aberastasuna hurreratu nahi die herritarrei, eta, aldi berean, jendea animatu hogeita hamarretik gora museoek jagoten dituzten altxorrak toki hauetan bisitatzera: Abanto-Zierbena, Bakio, Balmaseda, Berango, Bermeo, Bilbo, Dima, Durango, Galdames, Gernika, Getxo, Karrantza, Mañaria, Muskiz, Orozko, Plentzia, Portugalete, Santurtzi, Sopuerta eta Ziortza-Bolibar.
Euskara, Kultura eta Kiroleko diputatu Lorea Bilbaok kale-erakusketa ibili du, zentroetako batzuen arduradunak lagun, eta Bizkaiko museo bakoitzaren piezarik adierazgarriak ikusi ahal izan ditu bertan: Lurraldeko museoetan dauden hogeita hamar « bitxi » baino gehiago. Museo bakoitzaren arduradunek, erakusketarako aukeratutako pieza erakutsi ondoren, herritarrak gonbidatu dituzte eurek ordezkatzen duten museora gerturatzera, hurbiletik ezagutu ahal izan dezaten barruan daukatena, esperientzia horrek bisita gehiago egitera bultzatuko dituelakoan.
Museoek ekainaren lehen hamabostaldian irekiko dizkiete ateak berriro bisitariei, eta Aldundiak bultzada bat eman nahi die, handienak zein txikienak ikusgai eginez.
Bizkaiko Foru Aldundiak esker ona erakutsi nahi die parte hartu duten museo guztiei, proiektu hau posible egiteagatik.
Hona hemen Bizkaiko Museoen Pasealekuan ikusgai dauden piezak (pieza bakoitzari buruzko informazio gehiagorako, bisitatu www. museoeneguna. eus):
Antzasti Euskaldunon Etxea: XX. mende hasierako gazazko soinekoa
Bizkaia-Arkeologi Museoa: Berreagako hilarria
Arrantzaleen Museoa: Bermeoko batzokiko murala (José María Ucelay)
Athletic Club Museoa: Koroazioaren Kopa
Loizaga Dorrea: Allen Runabout auto motorduna
Balmasedako Historiaren Museoa: Balmasedako hiribilduko errege-pribilegio guztien kopia-liburua Balmasedako Pasio Bizidunaren Interpretazio Zentroa: Ama Birjina eta Magdalena
Bilboko Arte Ederren Museoa: Emakume eserita haurra besoetan duela (Mary Cassatt)
Bilboko Berreginen Museoa: Bernayko altxorraren eszifoak
Pasoen Museoa
Bizkaia Zubia
Burdin Hesiaren Oroimenaren Museoa
Dolomiten Antzinako Fabrikaren Museoa: Polea-sistema erraldoia.
Durangoko Arte eta Historia Museoa: Durangoren maketa
El Pobal burdinola: Gabia.
Eleiz Museoa Kutxa
Enkarterriko Museoa: Otoitz-irudia (Antonio de Urrutia)
Euskal Herria Museoa: Aretx Malatua (Mamerto Seguí)
Euskal Herriko Meatzaritzaren Museoa: Jardinera-bagoia MMPV 609
Euskal Museoa: Santiago apostoluaren burua.
Euskararen Interpretazio Zentroa: Euskararen misterioa
Gernikako Bakearen Museoa: Gudari uniformea
Guggenheim-Bilbao Museoa: Denboraren Materia (Richard Serra).
Hontza Museoa: Japoniako armiarma-karramarro erraldoia
Itsasmuseum Bilbao: Karola garabia.
La Encartada Fabrika-Museoa: Iruteko selfaktina-makina
Orozko Museoa: Bizimodu tradizionala.
Plasentia de Butrón Museoa: Príncipe de Asturias ontziaren maketa.
Rialia Industria Museoa: Laborategia (Ceferino Olivé)
Santurtzi Itsasoa Interpretazio Zentroa: Enkante-mahaia.
Agurtza Arrantza Teknikaren Interpretazio Zentroa: Agurtza atunontzia.
Simón Bolívar Museoa: Simón Bolívarren bustoa
Txakolin Museoa-Txakolingunea: Bakioko Luzarraga baserriko dolarea
Bizkaizko museoak ezagutzeko paseoa
Gertaeraren datuak
Antolatu du
Bizkaiko Foru Aldundia
Non
Uribitarte Pasealekua
Noiz
08/06/2020-etik 08/07/2020-era
Iruzkinak
Hasi saioa iruzkin bat argitaratu ahal izateko.