TESIA Jokin Cifuentes Antxia ikasleak BIKAIN CUM LAUDE kalifikazioa lortu zuen NAZIOARTEKO DOKTORETZA aipamenarekin 2025·12·16



- Tesi titulua: Design, EM Simulation, Manufacturing and Performance Evaluation of a Varactor-Based RIS

Epaimahaia:

- Lehendakaritza: Iñigo Ederra Urzainqui (Universidad Pública de Navarra)
- Bokala: Alessio Zappone (Universitá degli Studi di Cassino e del Lazio Meridionale)
- Idazkaritza: Maitane Barrenechea Carrasco (Mondragon Unibertsitatea)

Laburpena:

Haririk gabeko seigarren belaunaldiak (6G) 5G gainditzea espero da, datu-tasa oso altuak, latentzia oso baxua eta konektibitate unibertsala eskainiz, eta aldi berean energia-eraginkortasuna eta jasangarritasuna hobetuz. Helburu horiek lortzeko, funtsezko teknologia dira Gainazal Adimentsu Berkonfiguragarriak (RIS, ingelesezko sigletan). Hauek zelula unitario ugariz osatutako gailu pasiboak dira. Zelula hauek berkonfiguratuz, gainazalak seinaleen islapena alda dezake, komunikazio-kanalaren baldintzak hobetuz. Hala ere, RIS-en aplikazio praktikoa oraindik mugatua da, izan ere, ikerketa gehienak suposizio idealizatuetan oinarritzen dira eta diseinu praktikoari buruzko informazio urria eskaintzen dute. Tesi honek BST baraktoreetan oinarritutako 9. 6 GHz-etan funtzionatzen duen RIS prototipo baten diseinua, fabrikazio prozesua eta balioztapen esperimentala jorratzen du. Gainazalaren kontrola errazteko eta osagaiak murrizteko, taldekatze (clustering) estrategia bat erabili da, non zelula anitz baraktore eta kontrol-seinale bakar batekin konfiguratzen diren. Horrela, posible izan da osagaien eta kontrol-lineen kopurua %80 murriztea, errendimendu-galerarik handiena 1. 72 dB-koa izanik. 

Lan honek lau metasuperfizieren diseinua eta inplementazioa aurkezten ditu, RIS teknologiaren funtzionamendu-printzipioak esperimentalki baliozkotzeko. Simulazio elektromagnetikoak egin dira, osagaien tolerantziak, zelulen arteko akoplamendua eta S-parametroen eredu errealistak kontuan hartuz, eta emaitza esperimentalekin bat datorren korrelazio sendoa lortuz. Gainera, egindako ebaluazioek agerian uzten dute RIS eredu idealizatuen eta praktikoen arteko aldea, diskretizazioaren eta islapen-angeluaren menpekotasuna kuantifikatuz. Azkenik, lan honek RIS teknologia garatzeko metodologia praktikoa eta diseinu-gako nagusiak eskaintzen ditu, simulazio elektromagnetikoetan eta fabrikazioaren erronketan arreta berezia jarriz. Lortutako emaitzek etorkizuneko RIS inplementazioetarako erreferentzia baliotsua eskaintzen dute.