Bizkaia Aretoan duzue ikusgai Gradu Amaierako Lanen XI. erakusketa, urtarrilaren 10era arte. Makina bat ikaslek hartu dute parte aipaturiko mostra horretan.

Erakusketarako prestatu den katalogoan hauxe irakurri dugu: “Erakusketa hitzaren azpian  zer dagoen asmatzea ez da lan zaila, erakusteko ariketa egiten duen ekimentzat hartzen   baitugu erakusketa. Beraz, galdetu beharko genuke zer den Arte  Ederrak 24 izenburupean  erakutsi nahi dena, nork erakusten duen eta nori erakutsi nahi zaion.
Gainera, nola erakutsi behar dugun ere galdera egokia izango litzateke. Hain zuzen, artea da sarritan erakusketa hitzarekin lotzen dena. Edozein gauza erakutsi daiteke, baina  badirudi arte jardunari estu lotutako ariketa dela erakusketarena. Hala da, esku artean  daukazun katalogoaren kasuan. Arte  Ederren Fakultatean ikasketak amaitzeko derrigorrezkoa den Gradu Amaierako Lanaren erakusketan zaude. Beraz, ez da artelanen ohiko erakusketa bat, lan akademikoen emaitza baizik.
Zehaztasun hori egin ondoren, Bizkaia Aretoko geletan zer ikusiko dugun argi izango dugu:   unibertsitatean ohikoak diren hausnarketa teorikoekin batera, lan praktikoak topatuko ditugu. Artea, Sorkuntza eta Diseinua eta Zaintza eta Zaharberritze gradutan lau urtetan izena emanda egon diren ikasleek egindako  lanak, beraz. Ikasketen lau urteko emaitza  modu askotan ospatu daiteke, fakultate eta eskola askotan graduazio ekitaldi berdintsuak  egiten  dituzte: paperezko titulu banaketak. Baina, Arte Ederren Fakultatearen berezitasuna erakusketa bat antolatzean datza. Erakusketa baino ekitaldi egokiagorik ez dago arte fakultate baten graduazioa ospatzeko. Kontutan izan behar dugu, beste ikasketa batzuekin alderatuta, buru hausnarketa ahaztu gabe, Arte Ederretan alderdi  sentsorialak  garrantzi handia duela eta hori abantaila da gizarteari komunikatu behar diogunean zer egiten dugun ikasketa zentroan”.