Urriaren 5ean, Donostiako Hezkuntza eta Filosofia Fakultatean, 10:30etik 13:30era, haur eta gazte literatura eta bitartekaritzaz hitz egiteko espazioa sortuko du Galtzagorri Elkarteak. Hain zuzen, "Haur eta gazte literatura: bitartekaritza jomugan" jardunaldiak antolatu ditu "Haur eta gazte literatura eskolan" ikastaroaren harira. Izan ere, EHUrekin batera antolatzen duen ikastaroaren bost edizio egin dira dagoeneko, eta 2025ean goitik behera aldatzeko asmoa dago bitartekaritzaren praktikak erdigunean jartzeko. Jardunaldiok orain artekoa jaso eta datorrenari begira jartzeko antolatu dira, eta izena emateko epea irekita dago. Bitartekaria bazara —izan irakasle, guraso, liburuzain, ipuin kontalari, ilustratzaile, idazle edo gaia zure interesekoa bada— eman izena hemen. Programa xumea izango da, akademiaren barruan kokatuta ere, jardunaldietan parte hartuko duzuen bitartekariek esperientziak truka ditzazuen; zein kezka duzue, zein zailtasun, zein erronka? Ipuin kontaketa batekin hasiko da saioa, eta, aurkezpen labur baten ostean, lan-mahaietan banatuko da jendea. Aukeratu zure lan mahaia.