Bikotean ibiliko dira 2024ko neguan, solasaldi-emanaldiak eskainiz, gertuko giroan, orain arte arrazoi bategatik edo besteagatik iristerik izan ez duten herrietan. Bere izena ere ipini diote formatu txikiko proposamen honi: Kantuak Berbekaz Bete. Kantuak Berbekaz Bete berezi egingo duena, batez ere, solasaldi-emanaldi formatua izango da. Bertsogintzaren eta euskal kantagintzaren baitan kokatuko dute Anonyme Popular egitasmoa, eta, hala ulertuta, beraien sorkuntzaren eta proposamenaren gakoak ikus-entzuleekin partekatzea da euren nahia. Eszenaratze soilagoko eta harreman zuzenagoko formatua prestatu dute, bikotean jarduteko. Musikalki zein irudi aldetik zaindua izango da, hala ere; ikus-entzunezko bertsoak eskaintzen jarraituko dute, aurrez landutako moldaketekin eta bideo-proiekzioekin. - Ahotsa: Igor Elortza
- Gitarra: Rafa Rueda