Ion Munduate artistak Goldberg Versions pieza aurkezten du Steve Paxton. Drafting Interior Techniques erakusketaren barruan. Goldberg Versions lanean Steve Paxtonek 1985. urtetik 1992. urtera bitartean dantza bat-batekoetatik sortuz garatu zuen jatorrizko lanean oinarritutako lan prozesua erakusten da. Paxtonek Walter Berdinekin batera grabatu zuen bideoaren inguruan egin du lan Ion Munduatek, Ana Buitrago koreografoarekin elkarlanean. Artista horrek Paxtonen lanarekin lotutako Amsterdamgo Movement Research eskolan ikasi zuen, eta bertatik bertara ezagutu zuen 1992an Paxtonen Bariazioen aurkezpena, hark dantzatu eta artxiboan jasota uzteko filmatu zituenean. Artistak deskribatzen duen moduan, «Goldberg Versions lanean badaude lehenagoko nire Translation proiektuarekiko elementu komun batzuk, eta horiek osatu dute pieza berri honen oinarria: mugimenduaren oharrak idaztea eta lortu nahi dena gauzatzera iristeko jarraibide jakinak idatziz jasotzea, eta, azkenik, material koreografikoa osatzeko lehendik badagoen pieza batean oinarritzea». Bachen Goldberg Bariazioetako musika, Steve Paxtonek Bariazioen inguruan sortutako mugimendu-pieza eta Glend Gouldek pianoz egindako interpretazioa dira, gehitu duenez, gogoeta egiteko eta bilatzeko hiru elementu nagusiak. Zehaztu duenaren arabera, «Hiru une horien artean zerbait askatzen da bien artean; Gouldi dagokionez, Bachen musika ulertzeko moduan muturrerainoko teknikan, eta, Paxtoni dagokionez, mugimendua, inprobisazioa eta musika ulertzeko moduan, biak ala biak exekuzioaren zailtasuna gainditzen ari direnaren itxura gauzatzen duen soiltasun, arintasun eta jarioarekin». Ion Munduate (Donostia, 1969). Donostian, Madrilen eta Parisen egin zituen ikasketak. 1994an, elkarlan artistiko bizi-biziari ekin zion Blanca Calvorekin batera, eta hainbat artelan izan dira horren emaitza. Era berean, Mugatxoan sortu zuten 1998an, ikertzeari eta sortzeari eskainitako prestakuntza proiektua. Haien performanceak eta bideoak Europako hainbat espaziotan aurkeztu izan dira; hona hemen: GoGo, Caja Roja y Lucía con zeta (1998), Flyball, Boj de largo (2000), ASTRA TOUR (2003-2004), Extras de artificio (2005), BAT, Beautiful Animals Trying (2006), bai eta Sin título, en colores (2010), Translation (2013-2016) Las plumas (2017) eta Alfabeto Móvil (2017) ere. 2015ean Gure Artean saria jaso zuten Mugatxoan proiektuarekin, arte bisualen arloan egindako jarduera horrekiko aitortza bezala. Tailer eta mintegi ugaritan izan da irakasle, bai eta artista gazteen hainbat piezaren tutorea ere. Fitxa artistikoa:
Ion Munduaterekin
Mugimendu-laguntzailea: Ana Buitrago
Arte- eta ekoizpen-laguntzailea: Blanca Calvo