Urola Erdiko trikitixa 60/70. hamarkadan nola garatu zen jasotzen dituen bideografiak eta liburua aurkeztuko dute Trikigiro elkarteko kideek. Landutako dokumentalaren laburpena ere proiektatuko da bertan. 2010ean kokatzen da proiektu honen abiapuntua. Hain zuzen ere, San Jose jaialdia antolatzen duen lantaldeak jarri zuen lehen hazia. Hasiera batean dokumental bat egitea zen asmoa eta bide batez, elkarteko artxibo bat osatzea. Asmo horrekin aurkeztu zuten Trikigiro Elkarteak eta Kulturaz Azpeitiako Kultur Kooperatibak proiektua Azkoitiko Udalean 2018ko urrian. Denborarekin jabetu ginen dokumental bat baino egokiagoa izan zitekeela, elkarrizketatu bakoitzari bere bideografia egitea. Ekainaren 6an aurkeztuko da eginiko lana Azpeitian, gaueko 21. 00etan hasita Soreasu Antzokian. Aurkezpen honen aurretik, trikipoteoa egingo dute Trikigirokoek, arratsaldeko 19:30ean Azpeitiko plazan elkartuta.